Please Daven for the unconditional release of: Eitan Avraham Mor, 23 Eitan Avraham ben Efrat לְדָוִ֗ד מִ֫זְמ֥וֹר לַֽ֖יי הָאָ֣רֶץ וּמְלוֹאָ֑הּ תֵּ֜בֵ֗ל וְיֹ֣שְׁבֵי בָֽהּ כִּי ה֖וּא עַל־יַמִּ֣ים יְסָדָ֑הּ וְעַל־נְ֜הָר֗וֹת יְכֽוֹנְנֶֽהָ מִי־יַֽ֖עֲלֶה בְּהַ֣ר יי וּמִי־יָ֜ק֗וּם בִּמְק֥וֹם קָדְשֽׁוֹ נְקִ֥י כַפַּ֗יִם וּבַ֪ר לֵ֫בָ֥ב אֲשֶׁ֚ר לֹֽא־נָשָׂ֣א לַשָּׁ֣וְא נַפְשִׁ֑י וְלֹ֖א נִשְׁבַּ֣ע לְמִרְמָֽה יִשָּׂ֣א בְ֖רָכָה מֵאֵ֣ת יי וּ֜צְדָקָ֗ה מֵֽאֱלֹהֵ֥י יִשְׁעֽוֹ זֶה דּ֣וֹר דֹּֽרְשָׁ֑יו מְבַקְשֵׁ֥י פָ֜נֶ֗יךָ יַֽעֲקֹ֣ב סֶֽלָה שְׂא֚וּ שְׁעָרִ֨ים | רָֽאשֵׁיכֶ֗ם וְ֖הִנָּֽשְׂאוּ פִּתְחֵ֣י עוֹלָ֑ם וְ֜יָב֗וֹא מֶ֣לֶךְ הַכָּבֽוֹד מִ֥י זֶה֘ מֶ֚לֶךְ הַכָּ֫ב֥וֹד יְ֖י עִזּ֣וּז וְגִבּ֑וֹר י֜י גִּבּ֥וֹר מִלְחָמָֽה שְׂא֚וּ שְׁעָרִ֨ים | רָֽאשֵׁיכֶ֗ם וּ֖שְׂאוּ פִּתְחֵ֣י עוֹלָ֑ם וְ֜יָבֹא מֶ֣לֶךְ הַכָּבֽוֹד מִ֚י ה֣וּא זֶה֘ מֶ֪לֶךְ הַכָּ֫ב֥וֹד יי צְבָא֑וֹת ה֚וּא מֶ֖לֶךְ הַכָּב֣וֹד סֶֽלָה | 
